Ҳимоячи

Chopard ва Guli орасидаги чалкашликлар ва адашишлар

himoyachi — Fri, 27 Mar 2009 20:57:05 GMT

К. Шойфеле Chopardдан ва Г. Каримова; Canal+

Chopard ва Guli орасидаги чалкашликлар ва адашишлар

Uznews.26.03.09 – Chopard ширкати вакиллари бугун Базелда очилган соатлар ва заргарлик буюмлари кўргазмасида Гулнора Каримованинг Guli бренди тақдимотидаги ўз иштирокларини аллақачон инкор эта бошлашди. Guli вакиллари эса бунинг аксини тасдиқлашмоқда.

Шопард ширкати ва Ўзбекистон президентининг қизига тегишли Guli заргарлик тармоғи вакиллари ўзаро ҳамкорликлари ҳақида мутлақо фарқли фикрларни билдиришмоқда. Улар бугун Швейцариянинг Базелида очилган соатлар ва заргарлик буюмлари кўргазмаси нинг башанг стендлари олдига келган журналистларни адаштиришмоқда.

Базелда бўлган немис газетачисининг айтишича, Шопард ширкати вакиллари, Guli тақдимоти Шопард ширкатидан мустақил тарзда ўтаётганини таъкидлашган.

Шопард вакилаларидан бири журналистга, унинг ширкати ва Guli ўртасидаги муносабатларни ҳал қилиш ва айрим жиҳатларини қайта ишлаш зарурлигини айтган.

Жумладан, Шопард қандай йўл билан Guli коллекцияси савдосидан тушган пулларннинг қандай йўл билан Ўзбекистондаги ҳайрия мақсадларига йўналтирилиши очиқланиши керак. Guli сайтининг тасдиқлашича, Каримова брендидаги буюмлар савдосидан тушган даромад Ўзбекистондаги болалар лойиҳаларига сарфланади.

Токи бу саволга охиригача жавоб топилмас экан, Шопард вакиласининг сўзларига кўра, ҳамкорликдаги тақдимот ҳақида гапиришга эртадир. Агар бу нарса амалга ошганда ҳам, бу Базелда бўлмайди ва шу йилнинг апрел майидан олдин амалга ошмайди.

Guli стенди олдида турган одамлар эса, мутлақо бошқа нарсани тасдиқлашган. Журналистнинг айтишича, Guliни тақдим этувчи Ўзбекистонлик аёл, ишонч билан ва овозида ҳеч бир шубҳа оҳангисиз, Гулнора Каримованинг заргарлик буюмлари кўргазмаси Шопард билан ҳамкорликда амалга оширилаётганлигини айтган! Ва Каримованинг барча коллекцияси махсус швейцар маркаси учун тайёрланган!

Бу ҳақда guli.uz бренди сайтида ҳам таъкидланади. Унинг биринчи саҳифасидаёқ "креатив сембиоз" — илк бор Базелда «люкс» тоифасидаги буюмлар кўргазмасига қўйилган Chopard учун Guli коллекциялари ҳақида айтилади.

Шопард ширкати матбуот котиби Дафне Секретан (Daphné Secretan) бугун ахборот олиш учун ёпиқ бўлди, бироқ бир кун илгари Uznews.netнинг сўровига жавобан, Шопарднинг янги ўзбек заргарлик бренди Guli билан ҳамкорликдаги тақдимоти ҳақида ҳеч нарса айта олмаслигини билдирган эди.

Шопард ширкати вакиллари ўртасидаги зиддият ва чалкашликлар ўтган ҳафтадаёқ, Гулнора Каримова ва Шопарднинг бизнес ҳамкорлиги ҳақидаги аҳборот эълон этилганидан кейин сезила бошлаганди.

Каримованинг Guli бренди готовится заргарлик бизнесининг энг чўққисига кўтарилаётгани ва энг башанг заргарлик уйлари ва маркалари билан бир қаторга кўтарилгани ҳақидаги ахборот, Каримов оиласи ҳақидаги хабарларга хамоҳанг чоп этила бошланди.

Ўзбекистондаги инсон ҳуқуқларининг аянч аҳволи, у ерда деярли 20 йилдан буён президент Ислом Каримов ҳукмронлик қилаётгани ва унинг диктаторча президентлиги унинг қизи Гулнора Каримованинг бойишига шароит яратгани, унинг аввалига Россия, кейинчалик Европа олий жамиятига кириш чиптаси бўлиб ҳизмат қилгани ҳақида айтила бошланди.

Бутун ҳафта давомида Шопард офисига журналистларнинг сўровлари тинмади, бундан ташқари улар ўзбекистонлик ҳуқуқ ҳимоячиси Абдуджалил Бойматовнинг очиқ мактубини олишда, бунда у швейцарияликларни, ширкат номини булғамаслик, унга Гулнора Каримованинг қонли бриллиантларини аралаштирмасликка, Guli билан ҳамкорлик қилмасликка чақиради.

Uznews.net

Фото: Canal Plus

Солижон Абдураҳмонов Журналистга чиқарилган ҳукм ўзгаришсиз қолдирилди

himoyachi — Thu, 26 Mar 2009 22:07:53 GMT

Солижон Абдураҳмонов

Журналистга чиқарилган ҳукм ўзгаришсиз қолдирилди

Uznews.26.03.09 – 25 март куни Қорақалпоғистон Олий суди, 10 йилга озодликдан маҳрум этилган журналист Солижон Абдураҳмоновга чиқарилган ҳукмни қайтадан ҳеч бир ўзгаришсиз ўз кучида қолдириш ҳақида қарор чиқарди. Ҳатто бундай қарор чиқарилишининг сабаби бир оғиз изоҳлаб ҳам ўтилмади.

Қорақалпоғистон Олий суди назорат комиссияси Uznews.netнинг 58 ёшли мухбири Солижон Абдураҳмонов ишини, бу сафар Ўзбекистон Олий суди ёзишмасига кўра қайта кўриб чиқаркан, тағин бирламчи инстанция ҳукмини тасдиқлади.

Бунга кўра 2008 йилнинг октябрида журналист ўта йирик миқдорда наркотик моддаларни сотишга уринишда айбланиб ўн йилга озодликдан маҳрум этилган, гарчи тергов пайтида, унинг айби исботланмаган эди.

Абдурахмоновнинг ўзи ва унинг ҳимояси, 7 июнь куни унинг машинасидан наркотикларнинг топилиши – бу мустақил журналистик фаолиятни тўхтатишга қасд қилган ҳуқуқ тартибот идоралари уюштирган фитна эканлигини айтишган эди.

Бироқ суд на журналист ва на унинг адвокати келтирган далилларини тингламади, шунингдек журналист иши билан шуғулланган Нукус терговчиларининг чалкаш ва зиддиятли кўргазмаларига ҳам эътибор бергани йўқ.

Нукус ШИИБ ходимлари Абдураҳмоновга гиёҳвандфурушлик айбини қўйишга ягона сабаб, тергов пайтида унинг гиёҳванд истеъмол қилмаслиги бўлганлигини очиқдан очиқ эътироф этишди.

Нима учун, наркотик солинган пакетлардан бармоқ излари олинмаганлиги сабабини эса, терговчи, уларни чанг босганлиги ва дактилоскопик экспертиза ўтказишдан мантиқ йўқлиги билан изоҳлади. Журналистнинг машинасини текширувдан ўтказишни рад этиш эса, унинг узоқ вақт қуёшда қолиб кетгани ва ундаги барча излар йўқолгани билан изоҳланди.

Бутун тергов давомида терговчилардан бирортаси ҳам, Абдураҳмоновнинг қаердан 114,18 грамм марихуана ва 5,89 грамм қора дори олиши мумкинлиги билан қизиқиб ҳа кўргани йўқ, деди судда журналист.

Гарчи бир неча кун давомида терговчилар журналистнинг мусодара этилган компьютерида сақланган материалларни кўчириш, уларни тахлаш билан овора бўлишди ва унга унинг журналистик ишига оид, таҳририят ва бошқа ҳамкасблари Билан алоқасига оид саволлар беришди.

«Иш мутлақ уйдирилган эди, буни ёш бола ҳам аниқлай оларди, бироқ, кўринадики, бу иш Олий суд ҳуқуқшуносларининг қўлидан келмас экан, - дейди журналистнинг адвокати ва акаса Бахром Абдурахмонов. – Ва мен нима учун бу ишни улар қила олмаслигини биламан, чунки бу – сиёсий буюртма».

Шу «сиёсий буюртмадан» келиб чиққан ҳолда, Қорақалпоғистон Олий суди аппеляция ҳайъати томонидан 2008 йилнинг ноябрида кўрилган, эндиликда эса назорат тартибида қайта кўриб чиқилган ўн йиллик ҳукм ўзгаришсиз қолдирилди.

Сиёсий буюртмага қарши қандай курашиш мумкин? Бу саволга адвокат жавоб бера олмайди. Унинг сўзларига кўра, у фақат мижозларини қонун ҳарфлари билангина ҳимоя қилишни билади. «Мутлақ қонунсизликка қарши қандай қонун бўлиши мумкин?» – дейди у.

Солижон Абдурахмонов ўтган йилнинг декабрида Қарши колониясида бўлган. Унинг яқинлари сўзларига кўра, оҳирги бор январда учрашганларида ёмон шароитдан шикоят қилмаган. Турма бу турма, уни чой ва ширинкулча бериш учун қамашгани ва суд қилишгани йўқ, дея жавоб берган.

Uznews.net

Андижоннинг қизил чироқлари

himoyachi — Thu, 26 Mar 2009 21:59:07 GMT

Андижоннинг қизил чироқлари

Uznews.27.03.09 – Бир неча йиллар бурун Ўзбекистонда борлиги инкор этиб келинган фоҳишабозлик, борган сари кўпроқ турмушга кириб келмоқда, бу ҳақда ҳатто маҳаллий расмий матбуотда ҳам айтила бошланди.

Шу ҳафтада Андижон вилоят ҳокимлиги газетаси «Андижоннома»да мухбир Саминжон Ҳусанзоданинг бу қинғир йўлга бутунлай кириб кетишига оз қолган андижонлик Музайё Хондамированинг аччиқ қисмати тўғрисидаги мақоласи чоп этилди.

Ушбу мақолада айтилишича, Андижон вилоят ички ишлар бошқармаси бошлиғи Бахтиёржон Ахмаджановга кўра, ўтган йил давомида Андижон ва унинг атрофидаги бузуқихоналарда қўшмачилик билан шуғулланувчи 54 аёл аниқланган.

Шу давр мобайнида 90 фоҳишанинг фаолиятига чек қўйилган, 285 аёл эса таносил касалликлари диспансерига даволаниш учун жўнатилган. Энг даҳшатлиси, уларнинг ичида 10 нафар вояга етмаган қизлар бор.

Рақамлар, албатта, ҳайратланарли. Бироқ шуни унутмаслик жоизки, аниқроқ натижани олиш учун, статистик маълумотларни камида ўн мартага кўпайтириш лозим.

Шунингдек, қадимий касб эгаларидан яна қанчаси ўзбек пойтахти Тошкентда ва қўшни Қирғизистоннинг Ўш ҳамда Жалолобод вилоятларида баданини сотиш билан шуғулланмоқда.

Аёлларни фоҳишалик билан шуғулланишга мажбур этувчи сабаблар турлича, бироқ уларнинг энг асосийси, постсовет ҳудудидаги барча мустақил давлатларга ҳос бўлган моддий нобарқарорликдир.

Аксарият аёлларни панелга фақат ўз шаҳвониятини қондириш истаги эмас, балки шундай мураккаб даврда тирикчилик қилиш, тағин ўз яқинларига ёрдам бериш эҳтиёжи етакламоқда.

Uznews.net

Ўзбекистон инсон ҳуқуқлари «Эзгулик” жамияти Баёноти

himoyachi — Wed, 25 Mar 2009 21:52:40 GMT

ЭЗГУ ФАОЛИЯТИМИЗНИ ҚЎЛЛАБ-ҚУВВАТЛАШГА ЧАҚИРАМИЗ!

Ўзбекистон инсон ҳуқуқлари «Эзгулик” жамияти матбуот хизмати муқаддам тарқатган хабарномасида жамият фаолиятига нисбатан ўзига хос таҳдидлар бошлангани, жамият раҳбарияти Чилонзор ва Собир Раҳимов тумани ИИБга чақирилгани таъкидлаганди. Шунингдек, жамиятга нисбатан таҳдидларни кейинги пайтларда тарқатилган бир қанча ўткир танқидий материллар, миршабнинг ноқонуний ишларини фош этувчи фактлар билан боғлаганди. Воқеалар силсиласи қуйидагича ривожланди.

Жамият раиси Васила Иноятова кеча, 25 март куни Чилонзор тумани прокуратураси ходимларининг мажбурий қистови билан жамият офиси жойлашган участка профилактика пунктида гўё жамият релизи орқали ўзини ҳақоратланган, манфаатлари топталган фуқаро сифатида ҳис қилаётган Исроил фуқароси Я.Илларионов ҳамда унинг ишончли вакили бўлмиш онаси Л. Илларионова билан учраштирилди. Ўзининг юридик малакага эканини таъкидлаган Илларионова «Эзгулик” жамиятининг таркатган материали фуқароларнинг мурожаатлари билан ишлаш тажрибаси талабга жавоб бермаслиги, ММХ нинг мутасадди ходимлари билан айнан шу масалада сухбат килгани, бундан кейин хам «керакли жойларга» мурожаат килажагини таъкидлади.

Миршаблар, прокуратура ходимлари ва фуқаро иштирокидаги мажлис об-ҳавосидан маълум бўлишича, жамиятнинг кейинги бир йилдаги релиз ва баёнотлари, улардан норози ўнлаб фуқароларнинг “ариза”лари йиғилган. Илларионовларнинг мурожаатлари бўйича раддия бериб, улардан кечирим сўралмаса, суд орқали чоралар кўрилармиш. Табиийки, жамият раҳбарияти бу каби тутуриқсиз тахдидлардан чўчимайди ва уларга ҳам жавоб бермоқчи эмас. Қолаверса, ҳар бир эълон қилинган материални асословчи далиллар етарли.

«Эзгулик» жамияти ўтган вақт мобайнида мамлакатдаги мавжуд муаммоларни ёритиш ва уларнинг ечими йўлида давлат идораларининг эътиборини қаратди. Бу холат жиноятчи ва коррупцион тарафларнинг ғазабига сабаб бўлиши табиий ва улар «Эзгулик»нинг эзгу ишларига болта уришга харакат қиладилар. «Эзгулик» жамияти барча прогрессив кучларни фаолиятимизни қўллашга, маънавий кўмакдош бўлишга чақиради.

26.03.2009

O’zbekiston Inson Huquqlari “EZGULIK” Human Rights Society of Uzbekistan
Raisi – Vasila Inoyatova. Navoiy ko’chasi, 7/418
tel. (+998 97)131-48-72; ofis: (+998 71)241-85-88;
E-mail: vasila.iva@gmail. com Website: http://www.ezgulik. org

Қирғизистонлик журналистлар ҳужумга учраган

himoyachi — Wed, 25 Mar 2009 21:24:40 GMT

Қирғизистонлик журналистлар ҳужумга учраган

Бишкек шаҳрида “Московский комсомолец в Кыргызстане” рўзномасининг икки ходимига ҳужум қилинган, журналистлар оғир аҳволда шифохонага ётқизилганлар.

Қирғизистон Ички ишлар вазирлиги мулозимларига кўра, ҳужум оқибатида “Московский комсомолец в Кыргызстане” рўзномасининг бош муҳаррири Улуғбек Бобоқулов ва мухбири Елена Агеева кўплаб жароҳат олганлар.

Вазирлик матбуот хизмати бошлиғи Бақит Сейитовнинг айтишича, 25 мартдан 26-га ўтар кечаси журналистларга уюштирилган ҳужумнинг уларнинг касбий фаолиятига алоқаси йўқ.

Ҳужум қилган шахслар икки журналистнинг мобил телефонлари, пуллари ва кийимларини тортиб олганлар.

Ҳодиса юзасидан “Талончилик” банди бўйича жиноий иш қўзғатилиб, тергов бошланган.

Шифокорлар Улуғбек Бобоқуловнинг мияси чайқалган бўлиши мумкин деган хавотир билдиришган.

“Афт-башараларидан уч киши спортчиларга ўхшар эди", деб айтган шафқатсиз калтакланганидан кўзлари ҳам очилмай қолган рўзнома муҳаррири.

Улуғбек Бобоқулов аввал Қирғизистоннинг Жалолобод вилоятида инсон ҳуқуқлари ҳимоячиси сифатида фаолият юритган, кейинроқ “Фридом хаус” ташкилотининг пойтахт Бишкекдаги идорасига таклиф этилган.

Шундан сўнг у “Озодлик овози” халқаро бюллетень муҳаррири лавозимини эгаллаган.

Айни дамда Улуғбек Бобоқулов “Московский комсомолец в Кыргызстане” рўзномасининг бош муҳарриридир.

Журналистларни ҳимоя қилиш ташкилотларига мувофиқ, 2005 йилдан буён Қирғизистонда 50 дан ортиқ оммавий ахборот воситалари ходимларига турли ҳужумлар қилинган.

Ҳужумлар оқибатида бир неча мухбир вафот этган ва бир нечтаси чет мамлакатлардан бошпана сўрашга мажбур бўлишган.

Ўтган ой "Репортер Бишкек" рўзномаси журналисти Сиргак Абдилдаев калтаклаб кетилганди.

“Московский комсомолец в Кыргызстане” рўзномаси бош муҳарри ва журналистига ҳужумдан бир кун илгари Қирғизистондаги мустақил рўзномалардан "Лица" ўз нашрини номаълум муддатга тўхтатганини маълум қилган.

Газета таҳририяти ушбу қарорни, ўз таъбирича, "жамиятнинг маънавий тубанлашиб бораётгани" ва журналистлар хавфсизлигини таъминлаш тобора қийинлашиб бораётгани билан изоҳлаган.

Халқаро Амнистия: ўлим жазосига оид янги ҳисобот

himoyachi — Tue, 24 Mar 2009 23:00:07 GMT

Халқаро Амнистия: ўлим жазосига оид янги ҳисобот

Халқаро Амнистия ташкилоти ўлим жазоси қўлланиладиган мамлакатлар борасида ўзининг йиллик ҳисоботини чоп этди.

Ташкилотнинг хулоса қилишича, дунё давлатлари ўлим жазосини бутунлай бекор қилиш сари яна бир одим яқинлашишган.

Дунёнинг аксар мамлакатларида ўлим жазоси бекор қилинган.

Халқаро Амнистия кузатуви натижаларига кўра, ўлим ҳукми сақланиб қолган мамлакатларнинг ярмидан кўпроғида амалда олий жазо қўлланилмаган.

2008 йилда дунё бўйлаб ҳаммаси бўлиб 2390 киши қатл тилган ва яна 8,800-тадан кўпроқ одам ўлимга ҳукм этилган.

Ўлим жазосини энг кўп қўллаган мамлакатлар Хитой, Эрон, Саудия Арабистони, Покистон ва Қўшма Штатлардир.

Ушбу беш мамлакатда дунёдаги қатлларнинг 93 фоизи амалга оширилган.

Амнистия у берган рақамлар тахминий эканини айтади.

Ташкилотга кўра, тўрт мамлакат - Хитой, Беларус, Монголия ва Шимолий Кореяда ўлим жазоси махфий тарзда амалга оширилади.

Шунинг учун, дейди Халқаро Амнистия, бу мамлакатларда ўлим жазосининг қўлланишига оид ҳаққоний рақамлар юқорироқ бўлиши мумкин.

Номи зикр этилган мамлакатлардан ташқари адлия тизимида ўлим жазо мавжуд мамлакатлар сони 59 та эса-да, мазкур мамлакатларда сўнгги 25 йилда ўлим жазоси ижро этилмаган.

Халқаро Амнистия 30 йилдан буён дунёда ўлим жазосини бекор қилиш кампаниясини олиб бормоқда.

Унинг ишонишича, 2008 йилда ҳам қатлни бекор қилиш сари ижобий қадамлар ташланган.

Ташкилотнинг таъкидлашича, Оврўпода ўлим жазоси фақат Белорусда, Америка қитъасида эса фақат бир мамлакат - Қўшма Штатларда сақланиб қолган.

Юртдошини ўлдирган ўзбек 10 йилга қамалди

himoyachi — Tue, 24 Mar 2009 22:33:28 GMT

Юртдошини ўлдирган ўзбек 10 йилга қамалди

24.03.2009 Петербургнинг Красноселск туман суди Ўзбекистон фуқароси Матрасул Искандаровни 10 йилга озодликдан маҳрум қилди. Бу ҳақда Интерфакс агентлиги Петербург шаҳар прокуратурасига таянган ҳолда хабар қилади.

Ўзбекистонлик Искандаров Россия Федерацияси Жиноят кодексининг 105-моддаси 1-қисмида кўзда тутилган жиноятда (қотиллик) айбланган.

Петербург прокуратураси матбуот варақчасида Искандаров Петербургга пул ишлаш учун келгани, 2008 йилнинг сентябрида у ўз ҳамюрти А. билан ўзаро жанжал чоғида уни қаттиқ дўппослагани ҳамда пичоқ билан унга кўплаб жароҳатлар етказгани, жароҳатлар натижасида кўп қон йўқотган А. воқеа жойида жон бергани келтирилади.

“Жавобгарликдан қутулиш истагида Искандаров ўзи ўлдирган А. оиласи қураётган хусусий уй пойдевори остига жасадни кўмиб қўйган”, дейилади прокуратура матбуот варақчасида.

Шопард ва Гулининг қонли бриллиантлари

himoyachi — Tue, 24 Mar 2009 22:27:12 GMT

Каролин Шойфеле ва Гулнора Каримова

Шопард ва Гулининг қонли бриллиантлари

Uznews.24.03.09 — ЎИҲЖ ҳуқуқ ҳимоячиси Абдужалил Бойматов Chopard заргарлик ширкатини Гулнора Каримовага бўлган муносабати ва қонли бриллиантларни ёдга солувчи унинг Guli брендини қўллаб қувватлашни қайта кўриб чиқишга чақирди.

Ўзбекистон инсон ҳуқуқлари жамияти (ЎИҲЖ) фаоли Абдужалил Бойматов, душанба куни Швейцариянинг Шопард ширкати раҳбарига очиқ мактубини йўллади, унда ширкатнинг Ўзбекистон президентининг қизи Гулнора Каримова билан ҳамкорлиги маънисини англамаётганини билдиради.

Ушбу ҳафтада Швейцариянинг Базел шаҳрида очиладиган соатлар ва заргарлик буюмлари кўргазмасида Гулнора Каримованинг заргарлик йўналишидаги, маҳсус Chopard ширкати учун тайёрланган Guli бренди илк тақдимоти бўлади.

Guli сайтининг билдиришича, Базелда Каримова ноёб қимматбаҳо тошлар билан безатилган ўз заргарлик буюмларини намойиш этади. Кўргазмадан кейин улар бутун дунё бўйлаб Chopardнинг 150 дўконида савдога қўйилади, савдодан тушган пуллар Ўзбекистондаги болалар лойиҳаларини қўллашга сарфланади.

Шопарднинг Гули брендини қўллаб қувватлаши, Бойматовнинг сўзларига кўра, унда тушунмовчилик уйғотган.

«Мени сизнинг ширкатингиз қарори ҳайратга солди, унга асос солинган 19 асрдан буён, у ўзининг бутун дунё томонидан эътироф этилишига, мустабид золим ҳукмдорлар ва уларнинг қонли пуллари орқали эмас, балки ўз маҳсулотларининг гўзаллиги ва сифати билан эришган», - дея ёзади Бойматов ширкат соҳиблари Шопард Каролин ва Карл-Фридрих Шойфелга ўз мактубида.

Афтидан, таниқли Шопард заргарлик маркаси раҳбарлари Ўзбекистон ҳақида, унинг диктатор президенти Ислом Каримов ва унинг оиласи ўзлаштирган бойликларнинг келиб чиқиш тарихи ҳақида ниҳоятда кам маълумотга эга дея фараз қилади ҳуқуқ ҳимоячиси.

Ҳуқуқ ҳимоячисининг таъкидлашича, Guli заргарлик буюмларининг ҳар бирида Ўзбекистон халқининг қони ва кўзёшлари бор ва мабодо Шопард Каримова билан ўз ҳамкорлигини давом эттирса бу қон унинг ҳам бадном қилади.

Абдужалил Бойматов Шопард рахбариятига ёзган мактубида Ўзбекистонни шундай тасвирлайди.

«Ислом Каримов ҳукумат тепасига Ўзбекистон ССР Коммунистик партияси Биринчи котиби сифатида 1989 йили келди. Шу даврдан бошлаб Ўзбекистон халқи ундан ва унинг катта бўлиб қолган қизларидан қутила олгани йўқ, уларнинг хокимиятга ва бойликка бўлган иштаҳаси оталариникидан зиғирча кам эмас.

Каримовнинг 20 йиллик ҳукмронлиги даврида Ўзбекистон қашшоқ ва мутлақо ҳуқуқсиз бир мамлакатга айланди. Иқтисодий инқироз ва улкан миқёсдаги ишсизлик туфайли 28 миллионли аҳоли, Россия ва Қозоғистон каби мамлакатларга иш қидириб кетмоқда, улар билан қуллар каби муомалада бўлишмоқда.

Мамлакат иқтисодининг барса асосий сегментлари, газ экспортидан кўрилаётган даромадлар, олтин, пахта ва бошқа қимматбаҳо хом ашё Ислом Каримов оиласи ва уларга яқин шахслар томонидан тақсимланади. Бу бойликларнинг энг улкан қисми Гулнора Каримовага ажратилади.

Ўзбекистондан чиқариб юборилган аксарият бизнесменларнинг гувоҳлигига кўра, Гулнора Каримова уларнинг мулкини ноқонуний тарзда мусодара қилган. Рейдерлик, одамларнинг ўғирланиши, гаровга олиниши, қийноқлар – бизнесменларнинг айтишича, улар ўз бизнесларидан Каримова фойдасига воз кечишлари учун ушбу методлар уларга қарши қўлланилган.

Бундай ҳаракатни танқид қилиш Ўзбекистонда мумкин эмас. Мамлакатда мухолифат, мустақил матбуот йўқ. Кучишлатар тизимлар туну кун ҳукуматга ўз норозилигини билдирганларни йўқ қилиш билан шуғулланади.

Ҳуқуқ ҳимоячиларининг ҳисоб китобларига кўра, Ўзбекистонда камида 12 минг одам сиёсиё мотивларга кўра туомаларда сақланмоқда, улар орасида мухолифатчилар, журналистлар ва ҳуқуқ ҳимоячилари бор. Турмада улар қийноқларга, шафқатсиз муносабатларга солинади, бунинг натижасида ўз озодликларигача тириклай етиб бора олишмайди.

Ўзбекистонда бир маҳал, Ислом Каримов ва унинг оиласи сабабчи бўлиб келаётган бундай қатағонларга, қашшоқлик ва ўзбошимчаликларга қарши қўзғолишди. Бироқ Андижондаги 2005 йил 13 майда юз берган норозилик намойиши қонга ботирилди. Намойишчиларга қарши БТРлардан ўт очилди, кейин эса мамлакатга янада шафқатсиз қатағонлар ёпирилди.

Гули заргарлик буюмлари савдосидан кўрилган даромадлардан, ҳайрия мақсадларида, Ўзбекистондаги болалар лойиҳаларини ривожлантиришга сарфланиши ҳақида ўқиш мен учун кулгили. Қандай шармандалик!

Биласизми, Ўзбекистонда миллионлаб болалар ўқий олишмайди, чунки 1 сентябрдан улар мактабга эмас, пахта теримига боришлари лозим. 95% ўзбек пахтаси қўлда, асосан болаларнинг қўллари билан териб олинади!».

Мактуб якунида ҳуқуқ ҳимоячиси Шопард эгаси бўлган ака ва сингил Шойфелларга мурожаат этиб, Каримова билан ҳамкорлик ҳақида яна бир бор ўйлаб кўришга чақиради.

«Хоним ва жаноб Шойфеле, Шопард аҳлоқсиз бойлар жамияти рамзи бўлишини, ширкатингиз номи ёнида доимо қонли бриллиантлар ҳақида гапирилишини истамасангиз, яна бир бора ўйлаб кўринг», - дея якунлайди ўз мактубини Бойматов.

Uznews.net

Фото: Canal plus

Британия инсон ҳуқуқлари ҳисоботи эълон қилинди

himoyachi — Tue, 24 Mar 2009 21:50:00 GMT

Британия инсон ҳуқуқлари ҳисоботи эълон қилинди

Британия Ташқи ишлар вазирлиги инсон ҳуқуқлари вазиятига доир йиллик ҳисоботини эълон қилди.

Ҳисоботда, хусусан Ўзбекистондаги ўзгаришлар ҳақида бир мунча илиқ хулосалар билдирилади.

Ҳисоботга кўра, Ўзбекистонда ўлим жазосининг бекор қилиниши ҳамда сиёсий партиялар ролини кучайтириш борасидаги қонун қабул қилингани 2008 йилда Ўзбекистон ҳукумати амалга оширган ижобий чора-тадбирлар сирасига киради.

Шунингдек, ўтган йил апрелида Ўзбекистон парламенти одам савдосига қарши қонунни тасдиқлагани олқишланган.

Ижобий қадамлар билан бирга ҳисобот яна қатор хавотирга молик ҳолатлар сақланиб қолаётганини таъкидлайди.

Ўзбекистонда қийноқлар қўлланиши, сиёсий маҳбуслар мавжудлиги, болалар меҳнатидан фойдаланиш ҳамда содир этилган жиноятлар учун жазога тортилмаслик ҳолатлари алоҳида таъкидланган Британия Ташқи ишлар вазирлиги ҳисоботида.

Янги ҳисоботда ўтган йил декабр ойида Тошкент вилоят маҳкамаси Музаффар Тўйчиевнинг ҳибсхонада ҳалок бўлиши туфайли милиция ходимларини 8 йилдан 17 йилгача қамоқ жазосига ҳукм этгани ижобий баҳоланган.

"Бироқ шу билан бирга қийноқ ҳолатлари ортиб бораётгани ҳақидаги хабарлар бизни хавотирга солмоқда",дейилади унда.

2008 йили Ўзбекистонда бир неча инсон хуқуқлари фаоллари ҳибсдан озод этилди.

Лекин мустақил журналист Солижон Абдураҳмонов ва инсон ҳуқуқлари ҳимоячиси Аъзам Турғуновлар ўн йилллик қамоқ жазосига ҳукм этилдилар.

Ҳисоботда Солижон Абдураҳмонов устидан маҳкама адолатли бўлмагани ҳамда Аъзам Турғунов баданига қайноқ сув қуйилганининг хавотирли экани билдирилган.

Шунингдек, Ўзбекистондаги қонунчиликка мувофиқ, аксар маҳкама жараёнлари омма учун очиқ эса-да, халқаро кузатувчилар уларда қатнашишда қийинчиликларга дуч келаётгани таъкидланган.

Ўзбекистонда цензура 2002 йилда бекор қилинганига қарамай, хукуматни танқид қилишнинг олдини оладиган янги қонунлар жорий этилган, дейилади ҳисоботда.

Интернет фойдаланувчилари қатор саҳифаларни, жумладан, Би-би-си интернет сайтини бемалол очиб ўқий олмайдилар, дейилади Британия Ташқи ишлар вазирлигининг янги ҳисоботида.

Ўзбек совет “зиёли”лари

himoyachi — Tue, 24 Mar 2009 00:09:17 GMT

Ўзбек совет “зиёли”лари

Муҳаммадсолиҳ Абутов, Швеция.

Олиб даҳрийлардан таълим -тарбия,
“Доҳийлар” шаънига куйлаб мадҳия:
“Дунё бизники, бу қандай яхши-я,
Аждодимиз маймун экан майли-я,
Ёлғондир дин, имон,эҳсон, хайрия.
Яралдик ўзимиз - эволюция,
Кейин қилдик мана революция”.

Мана шу ғоялар фидойилари,
Бўлган ўзбек совет “зиёли”лари.

Қаранг буларга бир, дилда иймон йўқ,
Охират хавфи йўқ, қийнар виждон йўқ,
Муқаддас нарса йўқ, умид армон йўқ,
Аждодлари маймун бўлган - гумон йўқ,
Жаннат ҳам, дўзах ҳам, охир замон йўқ,
Ўлдингми - йўқ бўлдинг, энди нишон йўқ,
Тириксан, ўйнаб кул, кейин имкон йўқ,
Бу шиорсиз сенга мартаба, шон йўқ.

“Доҳиёна” йўлнинг фидоийлари,
Бўлган бизнинг совет “зиёли”лари.

Кўришлик гўёки “олий жамият”,
Бўлганмиш уларда мақсаду ният.
Доҳиёна ғоя бўлдику ҳужжат,
Илдизига болта урди бу миллат.
Ишчи-деҳқонларга бериб ҳуррият.
Гўё ишчи -деҳкон тузди ҳукумат.
Йўқ бўлди, қолмади исломга ҳурмат.
Худосизлик топди қадр ила қиммат.

Миллатни энг жоҳил гадойилари
Бўлган эди ўзбек “зиели”лари.

Зиёли сўзини асл маъноси
Нур тарқатувчидир - илми зиёси.
Илмсизлар бўлиб юртни “доно”си,
Нодон ҳисобланди диннинг муллоси.
Йўқ қилинди халқни ёзув имлоси.
Олинди бойларни кумуш-тиллоси.
Босиб “халқ душмани”-деган тамғоси.
Қамалди, отилди халқ уламоси.

Халкни энг ақлсиз савдойилари-
Булган ўзбек совет “зиёли”лари.

Замона тартибга тушганда бир оз,
Рухсат бўлди озроқ ўқимоқ намоз.
Барибир динга йўқ эди имтиёз,
Даҳрийлик ғояси қиларди парвоз,
Мумкинмасди баланд чиқариш овоз.
Динга қарши борар ташвиқот мумтоз,
Таъминлаб турарди буни давлат боз.
Мақсад эса динни йўқотиш тез соз.

Халқнинг гўё доно сипойилари -
Эди ўзбек совет “зиёли”лари.

“Тургунлик йиллари” деб,- қўйдилар ном,
“Эскилик сарқити” - дейилди ИСЛОМ.
Кураш ҳали ҳануз этарди давом,
Динга рўжуъ қила бошлади авом.
Қаерда бўлса бир жаноза мудом,
Тиловат бўларди, тинглар издиҳом.
Баъзи даҳрийлар ҳам “бузиб интизом”,
Келишарди динга қилиб эҳтиром.

Ўз ғояларининг риёйилари,
Бўлди ўзбек совет “зиёли”лари.

Даҳрийлик ғояси бош бўлса фақат,
Шу ғоя устида турса ҳукумат,
Бу ғоя исломга зид эди албат,
Ўлган бўлса кимдир ётибди муҳлат.
Нима керак унга бу диний бидъат?
Уйдирма гап бўлса дузаху - жаннат,
Даҳрий нега унга кўрсатиб ҳурмат,
Жанозага борса, бу қандай даҳшат?!

Дея, даҳрийларнинг вафойийлари,
Гапирди амалдор “зиёли”лари.

Шу билан бошлади сафин саралаб,
Риёкор даҳрийдан хизбин тозалаб.
Қабристонларга ҳам қўйилди миршаб,
Даҳрий бориб қолса олишди ушлаб.
Ушлади бир-бирин ортидан пойлаб,
Халққа кўрсатишди дарров жазолаб.
Даҳрийлар олдига қўйилди талаб-
Диндор бўлса даҳрий ушланг битталаб.

Ўз даврининг анков-анойилари.
булган эди узбек “зиели”лари.

Шоирмиди олим, ёки ёзувчи,
Ё сиёсий арбоб ё ўқитувчи.
Ё бирор ишчию-пахтакор сувчи,
Ё ҳофиз хонанда бастакор куйчи.
Ё талаба ёшлар илм олувчи,
“Ленинчи комсомол” деб аталувчи,
Шулар ўзин зиёли деб билувчи,
Даҳрийлик ғоясин тарғиб қилувчи.

Халк бошига тушган балойилари,
Шулар эди ўзбек “зиёлилари”.

Баъзида буларнинг хонадонида,
Ё қавми-қариндош қадрдонида.
Ўлиб қолса биров атроф ёнида,
(Бу ҳам даҳрийликнинг имтиҳонида).
Курашиш йўқ эди ҳеч имконида.
Курашиш бу ахир унинг нонида,
Йўқ эди ҳеч чора тўрт томонида,
Бечоралик ахир энг ёмонида.

Қийналарди нафси - ҳавойилари,
Хор бўлдилар ўзбек “зиёли”лари.

Ўғил ақл берар ота-онага,
“Қаранглар биз қурган бу замонага,
Бориб кўринг бизларни корхонага,
Аёллар ҳам кқмалганмас хонага.
Ҳамма тенг, ажралмас дўст бегонага.
Сизлар ишонасиз дин - афсонага.
Ҳар хил уйдирмаю ҳар девонага”.
Улар йиғлар, боқар жим остонага.
Оғир бўлди муъмин ота-онага.

Комсомол деган юрт беҳаёлилари.
Нодон эди ўзбек “зиёли”лари.

Бундай комсомоллар сабаб бегумон,
Бўлди кўп имонли юраклар вайрон.
Ўлса бежаноза кўмилди инсон,
Оғир ташвишда қолди ҳар мусулмон.
Аждодлар эсланиб ўқилмас Қуръон.
Ҳайкалларга тўлди барча қабристон.
Қийналаман агар эсласам ҳамон,
Ажиб бир ҳолатга тушганди замон.

Бетутуриқ замон расвойилари,
Бўлган ўзбек совет “зиёли”лари.

Буларга ҳам боққан бало бор экан,
Доноларидан ҳам “доно” бор экан.
Деди -”йулимизда хато бор экан,
Билмаган эканмиз худо бор экан.
Бизда озроқ кибру-ҳаво бор экан.
Маслаҳатга дўсту-ошно бор экан.
Ҳаётда ҳар дардга даво бор экан.
Қайта қурсак деган даъво бор экан”.

Шундай деди даҳрий пешвойилари,
Қарсак чалди ўзбек “зиёли”лари.

Авж ола бошлади турли иллатлар,
Сонсиз муаммолар, ҳар хил кулфатлар.
Ўзлигини англаб баъзи миллатлар,
Бошланди ўзаро жанглар даҳшатлар,
Авж олди ҳар турли ҳизб-ҳаракатлар.
Ҳаммаси йўлига қилиб даъватлар,
Билмас не қилишни халқлар - элатлар,
Донолар ҳам қилар эди ҳайратлар.

Довдирарди “жаноби олийлари”
Ҳайрон эди ўзбек “зиёли”лари.

Ҳамма йўл тополмай турган пайти лол,
Кутмаганда келиб қолди истиқлол.
Ўзин ўнглаб олиб “доно” ҳам дарҳол,
Мустақиллик эълон қилди бемалол.
Деди уялмасдан - “бу бизга ҳалол-.
Биз курашмаганда бўлмасди бу ҳол”.
Ҳеч кимдан чиқмади - қачон? -деб савол.
Ҳамма қарсак чалди доим шу аҳвол.

Ўзгардику фикри - ҳавойилари,
Бўлдилар “истиқлол зиёлилари”.

Биров гапирмади : мустақиллик деб,
Ғоя ўзгарами? -даҳрий эдик, -деб.
Бизнинг партиямиз коммунистик, -деб,
Миллатчилик қилган шовинистик, -деб,
Аввал аталарди босмачилик, -деб,
Эътиқод ўзгармас оз - кўпчилик, -деб,
Ёки адашибмиз, биз билмадик, -деб.
Ёки билганмизу қўрқар эдик, -деб,

Бир зумда ўзгарди, қолди раъйлари,
Мунофиқдир ўзбек “зиёли”лари.

Не бўлди бу ниқоб, ўзгарган билан?
Ташвиқоту-хитоб ўзгарган билан?
Хату-имло, китоб ўзгарган билан?
Қибла ўша, меҳроб ўзгарган билан!
Натижа шу, ҳисоб ўзгарган билан,
Савол ўша жавоб ўзгарган билан,
Амал ўша савоб ўзгарган билан,
Вақт ўзгарар, офтоб ўзгарган билан.

Ўзгармади зулми - жафойилари,
Виждони йўқ ўзбек “зиёли”лари.

Мустақил бўлишдан ким кўрди фойда?
Қиёс қилиб айтинг тафовут қайда?
Эски амалдорлар яшар саройда,
Сабаби ҳаммаси бадавлат - бойда.
Оддий халқ нон учун сарсон, ҳар жойда,
Қоринни ғами ҳеч битмас гадойда.
Подшонинг хаёли ердамас - ойда,
От изини босиш навбати тойда.

Энди мустақиллик даъвойилари,
Бесубутдир ўзбек “зиёли”лари.

Бошланди зулмлар аҳли имонга,
Қўли энди етган эди Қуръонга.
Дучор этиб уни турли бўҳтонга,
Қамай бошладилар яна зиндонга.
Масжидга бориш ҳам ёш намозхонга,
Мумкин эмас бўлди, қаранг замонга.
Даҳрий макр қилди кўп мусулмонга,
Ҳаёт яна қайтди келган томонга.

Иблис экан эргашган доҳийлари,
Имонсиздир ўзбек “зиёли”лари.

Даҳрийлик сиз учун лойиқроқ эди,
Уларку мантиққа яқинроқ эди.
Зулм қилишга ҳам “ҳақлироқ” эди,
“Даҳрийман десангиз” яхшироқ эди.
Бугунги ҳолат бир, тум-тароқ эди,
Мантиқу маънодан узоқроқ эди.
Аввал ким - кимлиги, аниқроқ эди,
Даҳрийлар сизлардан “тузукроқ” эди.

Зулму-залолатнинг давомийлари,
Малъун сизлар ўзбек “зиёли”лари!

Энди ғоя бўлди миллий мафкура,
Гўёки “бу афзал даҳрийдан кўра”.
Асли баб-баробар куфрдир жўра,
Шу ҳаёт йўлимиз қандаям “зўра”?
Оддий халқ билмайди сиёсий кўр-а?
Буни тушунади “зиёли тўра”.
Бўйнига бўйинбоғ таққандан сўра,
Шулар ижод қилган йўлда, “Мафкура”.

Бўлинглар охират сазойилари,
Эй, мустақилликнинг “зиёли”лари.

Кутиб адо бўлдику халқ бардоши,
Чиқмадику “мустақиллик қуёши”.
Ёрилди сал “ғиринг” деганни боши,
Турмаларда ётар ўғли-қардоши.
Окди оналарнинг қанча кўз ёши,
Ҳаром бўлди қанча одамнинг оши.
Отилди ҳар ёқдан маломат-тоши,
Ҳайрон бўлди юртни қарию - ёши.

Мангу азоб бўлгай жазойилари,
Ўзбекнинг имонсиз “зиёли”лари.

2008 йил, Можайск қамоқхонаси.

Дунёдаги энг арзон автомобиль сотувга чиқарилди

himoyachi — Mon, 23 Mar 2009 23:33:29 GMT

Дунёдаги энг арзон автомобиль сотувга чиқарилди

Ҳиндистоннинг Tata Motors компанияси дунёдаги энг арзон автомобилни сотувга чиқармоқда.

Узунлиги бор-йўғи 3,1 метр бўлган "Нано" русумли ушбу автомобиль беш киши учун мўлжалланган.

Tata Motors компанияси "Нано"нинг қийматини 100 минг рупий (1979 доллар) этиб белгилаган.

"Нано" двигателининг ҳажми - 624 куб. см. Ҳаммаси бўлиб 33 От кучига эга ушбу автомобилда на кондиционер ва на радио бор.

Аммо автомобилнинг арзонлиги ривожланаётган мамлакатларда кўпларнинг эътиборини ўзига тортган.

Аммо кўпчилик мутахассислар "Нано" автомобилининг Tata Motors компанияси дуч келган муаммоларни ҳал этишига шубҳа билан қарашади.

Ўтган йилнинг октябр ва декабр ойлари орасида компания 54 млн. доллар зарар кўрди.

Tata Motors, шунингдек, Jaguar ва Land Rover русумли автомобиллар брэндини сотиб олиш учун Ford Motor компаниясидан ўтган йил июнида олган 3 миллиард доллар қарзни тўлашга қийналмоқда.

Бундан ташқари глобал иқтисодий инқироз туфайли ширкатнинг янги автомобилларига бўлган талаб қисқарган.

"Нано"- муаммо

"Нано" русумли автомобилларни ишлаб чиқариш дастлаб ўтган йилнинг октябр ойига режалаштирилганди.

Бироқ мазкур режа автомобилни қаерда ишлаб чиқариш юзасидан чиққан тортишувлар туфайли амалга ошмасдан қолди.

Маҳаллий фермерлар билан бўлган можаро туфайли Tata Motors "Нано"ни ишлаб чиқаришни Ғарбий Бенголдан Гужарот штатига кўчирган эди.

Аммо Гужаротда завод ҳали қуриб битказилмагани учун "Нано" ҳозирча Tata Motors-га қарашли бошқа ширкатларда ишлаб чиқарилади

'Эзгулик' жамияти фаолияти билан милиция шуғулланмоқда

himoyachi — Mon, 23 Mar 2009 22:52:01 GMT

'Эзгулик' жамияти фаолияти билан милиция шуғулланмоқда

"Эзгулик" инсон ҳуқуқлари жамиятидан билдиришларича, жамият фаолияти билан жиноят қидирув бўлими шуғулланаётгани ҳақида огоҳлантирилганлар.

"Эзгулик" жамияти тарқатган хабарга кўра, 24 март куни жамиятнинг Тошкентдаги идорасига Тошкент шаҳар ва Шайҳонтоҳур милициялари, Чилонзор туман прокуратураси ходимлари боришган.

Инсон ҳуқуқларини ҳимоя қилиш жамиятининг раиси Васила Иноятова хонадонига Тошкентнинг Собир Раҳимов тумани милицияси жиноят қидирув бўлими ходимлари борганлар.

Прокуратура ходимлари ушбу ташриф сабабини Исроил фуқаросидан тушган ариза билан изоҳлаганлар.

Шунингдек, "Эзгулик" жамияти интернетда тарқатаётган хабарлардан бир неча киши норозилик билдириб, Тошкент шаҳар Ички ишлар бошқармасига мурожаат қилгани айтилган.

Инсон ҳуқуқлари жамияти раҳбарларининг 25 март куни милиция ва прокуратура идораларига бориши талаб қилинган.

Жамият фаоллари эса ушбу текширув сабабини "Эзгулик"нинг сўнгги пайтда эълон қилган милиция ходимларининг ноқонуний амаллари фош этилган ахбороти билан боғлайдилар.

"Жамият раҳбари Васила Иноятованинг таъкидлашича, бу сигнал куни кеча жамият эълон қилган "Миршаббошининг иқрорномаси: фош бўлган фитна" номли релизи, коррупцион доираларнинг манфаатига етган зарарга муносабатдир", дея хабар қилади "Эзгулик" жамияти.

Ирландия ўзбекларни қабул қилиши мумкин

himoyachi — Mon, 23 Mar 2009 22:35:51 GMT

Гуантанамодаги маҳкум

Ирландия ўзбекларни қабул қилиши мумкин

Uznews.20.03.09 – Ирландия Бош вазири Брайн Коэн ўзининг CNNга берган интервьюсида, унинг мамлакати Гунтанамо маҳкумларининг катта бир қисмини олишини билдирди. Халқаро Амнистия, улар орасида ўзбекистонлик Ойбек Жабборов ҳам бор дея ҳисобламоқда.

Шу ҳафтада Ирландия Бош вазири Брайн Коэн (Brian Cowen) АҚШга ташриф буюрди, бу ташриф давомида у Си-эн-эннинг «Situation Room» дастурига интервью берди.

Дастур журналисти Вулф Блитцер билан суҳбатда ирланд Бош вазири, унинг мамлакати, биринчилардан бўлиб АҚШнинг Гуантанамодаги базасида жойлашган турмани ёпишни ёқлаб чиққани, бир қанча махбусларни қабул қилишини билдирган.

Айнан қанча одамни, деган аниқлаштирувчи саволга Брайн Коэн: «биз пропорционал миқдорда, камроқ қисмини оламиз» дея жавоб берди.

Ирланд Бош вазири сўзларига кўра, унинг мамлакати Гуантанамо турмасини ёпишни ёқлаган, эндиликда эса у, турли сабабларга кўра уйларига қайта олишмайдиган махкумларни тақсимлашда АҚШга кўмаклашиши зарур.

Ирландия илгари террорчиликда айбланган одамларни қабул қиларкан, Коэн таъкидлайдики, ўз қарори учун бор жавобгарликни ўз зиммасига олади. Шунинг учун, улар ортидан кузатишади, айни пайтда террорчилик айби олиб ташланган шахсларгина қабул қилинади.

Нуфузли «Халқаро Амнистия» ҳуқуқ ҳимояси ташкилоти, Ўзбекистоннинг Наманган вилоятида туғилган 30-ёшли ўзбекистонлик Ойбек Жаббаровни тавсия қилиб, Ирландия ҳукуматини унга бошпана беришга ундамоқда.

2008 йилиёқ АҚШ ҳукумати Жабборовни озод қилиш ҳақида қарор чиқарган, унинг айбсизлиги ва террорсилик фаолиятида иштирок этмаганлигига ишонч ҳосил қилган эди.

Бироқ Жабборов ҳамон илгаригидек Гуантанамо панжаралари ортида қолмоқда, унинг Ўзбекистонга қайтиши мумкин эмас, чунки уни у ерда муқаррар қийноқлар, шафқатсиз муносабатлар кутади, шунингдек, хали бирорта давлат унга бошпана бериш истагини билдирмаган.

«Халқаро Амнистия»нинг Дублиндаги офиси вакили Uznews.net сўровига, улар Ойбек Жабборов масаласи юзасидан ирланд ҳукумати билан гаплашишда давом этишаётгани, ушбу мамлакатда у нормал ҳаётини йўлга қўйиши мумкинлигини билдирди.

Ойбек Жабборов, «Озодлик» радиосининг билдиришича, 2001 йили АҚШ ҳужуми пайтида Афғонистоннинг шимолида ушланган. У ўз оиласи билан 1999 йилдан буён Мозори шарифда яшаб келган, Ўзбекистон Исломий ҳаракатининг (ЎИҲ) аъзоларидан бири бўлган.

Бироқ, Жабборовнинг айтишича, у «айбсиз». www.rferl.orgда эълон қилинган, Жабборовнинг инглиз тилидаги мактубида унинг 2002 йилнинг июнидан буён Гуантанамода эканлиги айтилади.

«Бироқ мен айбсизман, менинг Гуантанамони тарк қилишга ҳаққим бор, бироқ мен қаерга бораман? Мен ватанимга, Ўзбекистонга қайта олмайман, чунки бу мен учун, менинг хотиним ва ўғилларим учун ҳавфсиз эмас».

Жабборовнинг айтишича, Гуантанамода унга нисбатан шафқатсиз муносабат ва қийноқлар қўлланилган, бироқ у АҚШ халқини унинг ҳукумати қилган хатолар учун айблашни истамайди. «Гарчи мен хамон шу ердалигимга қарамай менинг юрагимда нафрат йўқ», - дея ёзади Жабборов.

Озодликда у қишлоқ хўжалиги билан шуғулланишни, мева ва сабзовотлар етиштиришни ва ўз оиласи билан тинч осойишта яшашни орзу қилган. Гарчи хотини ва ўғилларини қаердан қидиришни билмайди, уларнинг кенжаси унинг йўқлигида туғилган.

Uznews.net

Қирғизистонда ҳижобга қўйилган тақиқ бекор қилинди

himoyachi — Sat, 21 Mar 2009 19:14:58 GMT

Қирғизистонда ҳижобга қўйилган тақиқ бекор қилинди

Тўлқинбек Турдибоев

Би-би-си, Бишкек

Қирғизистон Маориф ва фан вазирлиги хотин-қизларнинг ўқув юртларига ҳижоб билан келишларига қўйилган тақиқни бекор қилган.

Вазирликнинг ушбу қадами Қирғизистондаги муслима хотин-қизлар ҳуқуқларини ҳимоя қилувчи "Мутаккаллим" нодавлат ташкилотининг айни буйруқ юзасидан маҳкамага қилган шикоят аризаси билан чиқишига ҳам сабаб бўлганди.

Маориф ва фан вазирлиги феврал ойининг ўрталарида махсус буйруқ чиқариб, мамлакат хотин-қизларининг олий ўқув юртларига ҳижоб билан келишларини маън этганди.

"Мутаккаллим" нодавлат ташкилоти раисаси Жамол Фронтбек қизи аввалроқ, "Маориф ва фан вазирлиги ўз фармонини бекор қилмагунча, маҳкамага тўхтовсиз мурожаат қилаверишлари"ни билдирганди.

Унинг айтишича, вазирлик фармонини бекор қилиниши хусусида 50 мингга яқин муслима хотин-қизларнинг имзоларини тўплашга ҳам муваффақ бўлишган.

Бироқ Маориф ва фан вазирлиги ҳали маҳкама ҳукмини кутмай туриб, ўз буйруғига тузатиш киритган. Мулозимлар ўз қарорлари сабабини хотин-қизларнинг Олий таълим олишларига кўпроқ шароит яратиш нияти билан изоҳлашмоқда

Вазирлик масъулларига кўра, ўқувчи ва талаба қизларнинг фақат бир хил либосда дарсга қатнашларини кўзда тутиб эълон қилинган фармонни мактаб ва ўқув юртлари раҳбарлари айрим пайтларда янглиш тушуниб, диний кўринишдаги кийимларни тақиқлаган бўлишлари мумкин.

Ўз навбатида дунёвий жамият вакиллари вазирликнинг сўнгги қароридан ўз норозиликларини изҳор этишмоқда.

Уларнинг фикрларича, ҳижоб ёки рўмолда ўқув юртларига бориш, бу - дунёвий маориф тизимига диний хусусиятларни киритишдир

Муътабар Тожибоева 'Жасорати учун' тақдирланди

himoyachi — Sat, 21 Mar 2009 18:40:11 GMT

Муътабар Тожибоева 'Жасорати учун' тақдирланди

Ўзбекистонлик таниқли инсон ҳуқуқлари фаоли Муътабар Тожибоева Америка ҳукуматининг 'Жасорати учун' мукофоти билан тақдирланди.

Мукофот Тожибоева хонимга ўтган тунда АҚШ Давлат департаментида бўлиб ўтган маросим чоғида Америка Президенти Барак Обаманинг рафиқаси Мишел Обама ва Давлат котибаси Ҳиллари Клинтон хонимлар томонидан топширилган.

Маросим ортидан Би-би-сига берган суҳбатида Тожибоева хоним, "Мукофотнинг айнан ўзбекистонлик фуқаролик жамияти фаоли, аёл кишига берилганлиги Ўзбекистон халқининг аянчли тақдири нафақат оврўполикларни, балки Америка ҳукуматини ҳам хавотирга солганлигини исботлаши"ни айтган.

Tожибоева хонимга кўра, "Жасорати учун" мукофотини топшираркан, Ҳиллари Клинтон хоним унга Ўзбекистондаги вазиятдан тўлиқ хабардор экани, шахсий кечмиши билан тўлиқ танишиб чиққанлиги, кўрсатган мардлиги, жасорати учун ўзини тўлиқ қўллаб-қувватлашини таъкидлаган.

Ўзбекистонлик инсон ҳуқуқлари фаолининг айтишича, "Олган барча халқаро мукофотлари нафақат ўзи учун, балки Ўзбекистондаги барча фуқаролик жамияти фаоллари, ўзбекистонлик аёллар учун бир ҳимоя қалқони бўлиб хизмат қилади."

Хорижда 5-6 ой даволаниши ортидан албатта Ўзбекистонга қайтишини билдирган Тожибоева хоним орадаги вақт давомида ўзининг айбсизлигини исботловчи ва Ўзбекистон ҳукуматининг жиноятларини фош этувчи қўлида бўлган барча ҳужжатлар асосида китоб ёзишга қарор қилганлигини айтган.

Бошқалар билан бир сафда

Ўзбекистонлик инсон ҳуқуқлари фаоли билан бирга яна дунёнинг бошқа давлатларидан бўлган етти аёл ҳам мазкур мукофотни қабул қилиб олишган.

Уларнинг орасида Гватемала, Афғонистон, Ироқ, Малайзия, Нигерия, Россия ва Яман давлати вакилалари бор.

"Жасорати учун" мукофотига номзодлар дунёдаги АҚШ элчихоналари томонидан танланган.

Мишел Обама хоним, мукофот соҳибалари қолган аёлларни ўзлари, бир-бирлари ва умуман адолат учун курашга ўргатишини айтган.

"Биз бу ерда мукофот топширган аёллар ўзлари, оналари, қизлари, опа-сингиллари, бувилари ва дўстлари учун туриб бериш йўлида ўз ҳаётлари билан таваккал қилишади. Шундай иш тутиш билан нафақат улар учун, балки оталари, ўғиллари, ака-укалари, боболари ва турмуш ўртоқлари учун ҳам яхшироқ жамиятни барпо этишади," деб айтган Обама хоним.

Америкалик бу икки нуфузли аёлнинг таъкидлашларича, саккизовлон ижтимоий адолатни қарор топтириш ва инсон ҳуқуқларини ҳимоя қилиш йўлида ўз ҳаётларини хавф остига қўйган инсонлардир.

Учинчи халқаро мукофот

Бу бир йил ичида Ўзбекистондаги норасмий "Ўтюрак клуби" раҳбари Тожибоева хонимга берилаётган учинчи халқаро мукофотдир.

Мўътабар Тожибоева Анжижон воқеаларини қоралаб чиққан ва мустақил текширув ўтказиш ҳақидаги чақириқларга қўшилганди.

Орадан кўп ўтмай, Тожибоева ҳибсга олинган ва Ўзбекистон маҳкамаси уни таъмагирлик ва туҳмат қилиш дохил, бир қатор иқтисодий жиноятларда айбдор деб топаркан, саккиз йилга озодликдан маҳрум этилган эди.

Қамоқхонада соғлиги ўта ёмонлашган инсон ҳуқуқлари фаоли 2008 йилнинг июнида озодликка чиқарилган.

Ўтган йилнинг декабр ойида Мўътабар Тожибоева Франция Республикасининг инсон ҳуқуқлари бўйича "Озодлик, тенглик, биродарлик" мукофоти билан тақдирланганди.

Қамоқ жазосини ўтаётган пайт эса, Тожибоева хоним Инсон ҳуқуқлари фаоллари учун Мартин Энналс (Martin Ennals) мукофотига лойиқ, деб топилганди.

'Чўлпон китобидаги баъзи шеърлар илк чоп этилган'

himoyachi — Fri, 20 Mar 2009 23:28:33 GMT

'Чўлпон китобидаги баъзи шеърлар илк чоп этилган'

Москвадаги "Воскресенье" нашриёти атоқли ўзбек адиби Абдулҳамид Чўлпоннинг рус тилидаги сайланмасини нашрдан чиқарди.

Бу китобга адибнинг "Кеча ва кундуз" романи, "Ёрқиной" пьесаси ва танланган шеърлари киритилган.

Китобнинг тузувчиси ва таржимони Абдулҳамид Исмоил.

Бу сайланма Чўлпон асарларининг бошқа тилларга илк йирик таржимасидир.

Китобга кирган шеърларнинг баъзилари Чўлпон ҳаёти даврида кам сонли газета ва журналларда чоп этилган бўлиб, ўқувчи диққатига биринчи марта қайта ҳавола этилмоқда.

(BBCUZBEK.COM интернет-саҳифасида китоб тузувчиси ва таржимон Абдулҳамид Исмоил билан суҳбат тасвирга олинган видеолавҳа жойлаштирилган)

Қотил ўзбекистонлик 20 йилга қамалди

himoyachi — Fri, 20 Mar 2009 23:11:08 GMT

Қотил ўзбекистонлик 20 йилга қамалди

20.03.2009 Россиянинг Челябинск шаҳри Ленин тумани прокурорининг ёрдамчиси Марина Санниковани зўрлаганлик ва ўлдирганликда айбланмиш ўзбекистонлик Санжар Сатиев узоқ йилга озодликдан маҳрум қилинди. Бу ҳақда Регнум ахборот агентлиги Россия Федерацияси Тергов қўмитаси матбуот хизматига таянган ҳолда хабар қилади.

Тергов чоғида аниқланишича, 2008 йилнинг 1 январ тунида Челябинскда вақтинча қайддан ўтган Сатиев кўчада кетаётган Санниковага ҳужум қилиб, уни қаттиқ калтаклаган, сўнгра эса уни кимсасиз жойга олиб ўтиб, зўрлаган.

Шундан сўнг у прокурор ёрдамчисининг мобил телефони, тилла тақинчоқлари ва мўйнали пўстинини ўмариб, воқеа жойидан ғойиб бўлган. Калтакланган пайтда олган жароҳати натижасида Марина Санникова воқеа жойида жон берган.

Мазкур воқеадан сўнг ўзбекистонлик Санжар Сатиев ошиғич Россиядан чиқиб кетган. Халқаро қидирувга берилган Сатиев 2008 йил февралида Қозоғистон ҳудудида – йўловчи поезди вагонида қўлга олинган.

Челябинск вилоят суди томонидан талончилик, зўрлаш ва қотиллик жиноятларини содир этганликда айбдор деб топилган 28 ёшли Сатиев 20 йилга кесилди.

Обама Эрон билан янгича муносабатларга чақирди

himoyachi — Fri, 20 Mar 2009 22:52:51 GMT

Обама Эрон билан янгича муносабатларга чақирди

АҚШ президенти Эрон халқига мисли кўрилмаган видео мурожаат билан чиқди.

Барак Обама Вашингтон ва Эрон ўртасидаги муносабатларда 30 йилдан буён ҳукм сураётган "адоват ва ишончсизлик"ни тугатишга чақирди.

Наврўз байрами муносабати билан қилган чиқишида Обама Эрон билан "ҳалол ва ўзаро ҳурматга асосланган" алоқани ўрнатиш истагида эканини айтди.

Америка президенти эски келишмовчиликлар бартараф этилган ҳамда ҳамкорлик ва савдо учун янги имкониятлар яратилган даврнинг келишини сабрсизлик билан кутаётганини айтди.

"Эрон дунёда ўзининг қонуний ўрнини эгаллашга ҳақлидир", - деди Барак Обама. - "Аммо бунга террор ва қурол таҳдиди билан эмас, балки тинч йўллар билан эришиши керак."

"Янги давр"

"Менинг маъмуриятим ўнгимизда турган қатор муаммолар ечимини топишга қодир бўлган дипломатия ва конструктив алоқаларни ўрнатиш тарафдоридир", - деб айтди Америка президенти.

Вашингтон ва Теҳрон ўртасидаги келишмовчиликлар замирида Эрон ядровий дастури ва Теҳроннинг баъзи радикал гуруҳларни дастаклаши ётади.

Аммо собиқ президент Бушдан фарқли, Барак Обама Теҳрон билан очиқ бўлиш ва дипломатик алоқаларни ўрнатишга тайёр эканига ишора қилмоқда.

Президент Обама ҳеч қандай аниқ таклифни илгари сурмаган эса-да, Эрон билан муносабатларда "янги давр"нинг бошланишига умид қилаётганини айтди.

Аммо Америка президенти: "Бунга эришиш осон бўлмайди," - дея илова қилди.

"Ўтмиш хатолари"

Франс-Пресс хабар агентлигига гапирган Эрон президентининг маслаҳатчиси Али Акбар Жавонфикрга кўра, Эрон президент Обаманинг таклифини олқишлайди.

"Бироқ Вашингтон янада илгарироқ бориши ва ўтмишдаги хатоларини эътироф этиши керак", - деб илова қилди Али Акбар Жавонфикр.

Дипломатик масалалар бўйича Би-би-си мухбирининг айтишича, жаноб Обама ҳам Эроннинг уранни бойитиш дастуридан воз кечишини истайди.

Аммо Обама Теҳронни йўлдан қайтариш учун босим эмас, балки дипломатик мулоқот кўпроқ иш беришига умид қилади

Медведев Обамадан умидвор

himoyachi — Fri, 20 Mar 2009 16:43:12 GMT

Медведев Обамадан умидвор

20.03.2009 Россия президенти Дмитрий Медведев АҚШ президенти Барак Обама билан келаси ойга режалаштирилган учрашувда расмий Вашингтон билан муносабатлар моҳиятини тубдан қайта белгилашга умид билдирди.

Медведев 1 апрел куни Лондонда иш бошлайдиган катта йигирмалик саммити доирасида илк бор АҚШ президенти Барак Обама билан учрашади.

Вашингтон ва Москва ўртасидаги муносабатлар АҚШнинг шарқий Европада ракеталар ҳужумига қарши мудофаа тизимини ўрнатиш режаси ҳамда Россиянинг Грузияга бостириб бориши сабабли анча ёмонлашиб қолган эди.

Айни пайтда¸ Россия Ташқи ишлар вазири ўринбосари Сергей Рябков расмий Москва ўзаро муносабатлардаги совуқ даврнинг якун топганига ишонишини маълум қилди.

Ўзбекистон фуқароси қотилликда гумонланмоқда

himoyachi — Fri, 20 Mar 2009 16:38:51 GMT

Ўзбекистон фуқароси қотилликда гумонланмоқда

20.03.2009 Россиянинг Пенза вилоятида Ўзбекистон фуқаросига қотиллик содир этганлик айби эълон қилинди.

2008 йил 22 май куни Пенза шаҳридаги кўприк остида пичоқлаб ўлдирган 37 яшар маҳаллий фуқаронинг жасади топилган эди.

РФ прокуратураси хузуридаги Тергов қўмитаси расмийларининг ахборот воситаларига маълум қилишича, ишлаш учун Пензага борган 24 яшар Ўзбекистон фуқароси ушбу қотилликни содир этганликда гумон қилинмоқда

Ўзбекистон катта фирибгарни Россияга топширди

himoyachi — Fri, 20 Mar 2009 15:42:01 GMT

Ўзбекистон катта фирибгарни Россияга топширди

20.03.2009 Ўзбекистон банклар билан муомалаларда фирибгарлик қилишда гумон қилинган шахсни Россияга экстрадиция қилди.

Маълум бўлишича, халқаро қидирувда бўлган Германия фуқароси Воҳид Ҳошимий ўтган йил ёз фаслида Ўзбекистон ҳудудида ҳибсга олинган.

Россия Бош прокуратураси тарқатган маълумотга кўра, Ҳошимий ва унинг шериклари қонунга зид равишда амалга оширган молиявий операциялар натижасида 30 миллион доллардан кўпроқ пулни ноқонуний ўзлаштиришга муваффақ бўлган.

Ўзбеклар ҳимоячиси Ганнушкина тақдирланди

himoyachi — Fri, 20 Mar 2009 15:38:44 GMT

Ўзбеклар ҳимоячиси Ганнушкина тақдирланди

20.03.2009 Инсон ҳуқуқлари мавзуидаги ҳужжатли филмлар намойиш этилувчи "Яхлит дунë" фестивалида дунëнинг 40 мамлакатидан олиб келинган 143 филм 8 кун мобайнида намойиш қилинди.

Фестивал Чехиянинг собиқ президенти Васлав Ҳавел ҳомийлигида ўтди.

Кинофестивалда демократик ғоялар¸ инсон ҳуқуқларини тарғиб қилувчи¸ мустабид ва тоталитар режим қиëфасини фош қилувчи фильмлар намойиш қилинди.

"Фалокатдаги одамлар" нодавлат ташкилоти фестивалнинг асосий ташкилотчиларидан. Айни ташкилот “Одамдан одамга” (Homo Homini) деган мукофотни таъсис қилди.

Бу мукофот тоталитар режимлар босқиси остида қолганларга ëрдам қўлини чўзганларга берилади.

Бу йилги мукофот россиялик инсон ҳуқуқлари фаоли Светлана Ганнушкинага берилди.

Светлана Ганнушкина марказий осиëлик мигрантларга кўрсатган ëрдами учун бу мукофот билан тақдирланди.

Бу мукофотни бериш билан "Фалокатдаги одамлар" ташкилоти ирқчилик¸ шовинизм¸ ксенофобия кайфиятларининг Россияда кучайганига халқаро жамоатчилик эътиборини тортишни мақсад қилган.

Мукофотни олаëтиб Ганнушкина¸ биз оддий кишиларнинг сиëсатчилардан кўра кўпроқ тил топиша билишини исбот қила олдик¸ дея таъкидлади

Ҳимоячилар хайрияга муҳтож

himoyachi — Fri, 20 Mar 2009 15:20:46 GMT

Ҳимоячилар хайрияга муҳтож

Ўзбекистон ичкарисида қолган саноқли ҳуқуқ фаоллари¸ ўтказаëтган норозилик тадбирлари учун ҳеч кимдан пул олмасликларини айтадилар.

Садриддин 19.03.2009

Ўзбекистон инсон ҳуқуқлари альянси¸ мамлакатдаги вазиятни яхшилаш йўлида ўз соғлиғидан айрилиб¸ ночорликка тушиб қолган ҳуқуқ фаолларига молиявий кўмак йиғиш учун хайрия тадбири бошлади.

Алъянс фаоли Саломат Бойматованинг айтишича, бугун Ўзбекистонда эркин сўзга, ҳур фикрга ва инсон ҳуқуқи ҳимоячиларига нисбатан таъқиб ва тазйиқлар давом этмоқда. Ўзбекистонда қолган оз сонли ҳуқуқ ҳимоячилари норозилик намойишларини, пикетларни эмин-эркин ўтказа олмайдилар.

Ҳар қандай норозилик намойиши ва пикетлар милиция ходимлари томонидан ур-сурлар ва калтаклар билан тарқатиб юборилади. Инсон ҳуқуқи ҳимоячилари милиция бўлимларига олиб борилиб¸ уларга тазйиқлар ўтказилади ва бу ўз навбатида уларнинг соғлиғига, руҳиятига жиддий зарар етказади.

- Кўп инсон ҳуқуқлари ҳимоячиларининг соғлиқлари яхши эмас. 2008 йил 6 декабр куни пикетдан кейин ушлаб олиб кетишиб¸ судлар қилишганку. Ҳаммамизга 280 минг сўмдан штраф қўйилган эди.

Ўзи қийналиб яшаб турган пайтимизда¸ бу штрафни қандай қилиб тўлаймиз¸ деб асабийлашганидан кўпчилиги касал бўлиб қолган. Кимнингдир юраги касал¸ кимнингдир кўзлари хиралашиб қолган. Ўша маънода озгина ëрдам бўлармикан деб¸ ëзганмиз ўша баëнномани¸ дейди Саломат Бойматова.

Унинг сўзларига кўра, инсон ҳуқуқи ҳимоячилари жазирама иссиқ ва қаҳратон қишга қарамасдан, доим Ўзбекистонда сиёсий ва диний эътиқодлари учун қамалган одамларни озод қилишни ўз норозилик намойишларида талаб қилиб келадилар.

Уларни, милициянинг ҳар кунги кузатуви, ёлланма одамларнинг уларга ҳужум қилиши, қамоқлар, жарималар, зўравонликлар қўрқита олмайди.

Инсон ҳуқуқи ҳимоячилари Умида Ниёзова, Мўътабар Тожибоева, Улуғбек Ҳайдаров, Ёдгор Турлибековнинг озод қилинишида уларнинг ҳам ҳиссаси бор. Бироқ бу кун уларнинг ўзларининг саломатлиги ёмонлашмоқда. Даволангани эса маблағ йўқ, дейди Саломат Бойматова.

- Нима дейишим мумкин? Масалан¸ грант ë бошқа нарсалардан хабаримиз йўқку¸ лекин бир-икки марта пикетларда турганда Виктория Боженованинг сочини юлиб олганда¸ ўшаларга медицина ëрдами келган экан. Ўшандан хабарим бор.

Бошқа доим пул билан таъминлаб турилиши тўғрисида хабарим йўқ ва мен бу фикрга қўшилмайман. Умуман¸ бу тўғрида гап бўлиши мумкин эмас. Пикетларга ихтиëрий чиқилади ва пикетга чиқилганга ҳеч ким пул бермайди¸ дейди Саломат Бойматова.

Ўзбекистон расмий идоралари бу ҳуқуқ ҳимоячилари хориждан оладиган грантлар ҳисобига ишлашини, ҳар бир пикет ва норозилик намойишлари учун хорижий ташкилотлардан пул олиб туришларини айтади. Лекин Саломат Бойматова бу иддаоларни рад этади.

Унинг айтишича, улар шунчаки ўз фуқаролик бурчларини бажараяптилар¸ холос.

Жиззахлик инсон ҳуқуқи ҳимоячиси Бахтиёр Ҳамроев ҳам Ўзбекистондаги инсон ҳуқуқи фаоллари аллақандай чойчақа учун эмас, балки жамиятдаги адолатсизликларга қарши курашаётганини айтади.

- Бу ғирт ëлғон ва туҳматдан иборат. Биз мана Жиззахда қанча пикетлар¸ норозилик юришлари қилдик. Мен буни туҳмат деб биламан. Халқаро ташкилотлар бизга ҳеч қачон “Пикет уюштир¸ ë бошқа қил” деб пул ажратмайди¸ дейди Бахтиëр Ҳамроев.

Бахтиёр Ҳамроев, алъянс бошлаган бу хайрия тадбирини қўллаб-қувватлашини айтар экан, Ўзбекистонда қамоққа ташланган инсон ҳуқуқи фаолларининг оилалари ҳам оғир аҳволда эканлиги ва уларга ёрдам бериш лозимлигини таъкидлайди.

- Қаровсиз қолган ҳуқуқ ҳимоячилари¸ айниқса уларнинг оила аъзолари ниҳоятда камбағал ҳолда яшашади. Қамоқда ëтган ҳуқуқ ҳимоячилари маънавий қўллаб-қувватланиб турибди. Бунинг учун халқаро ташкилотларга минг раҳмат¸ дейди Бахтиëр Ҳамроев.

Журналист иши терговга ўтди

himoyachi — Fri, 20 Mar 2009 15:13:46 GMT

Журналист иши терговга ўтди

22 феврал куни Тошкентдаги уйида қамоққа олиниб¸ Самарқандга олиб кетилган журналист ва ҳуқуқ фаоли Дилмурод Саййиднинг ҳибсдаги аҳволи ҳақда унинг адвокати бир гапни¸ ҳамкасблари эса¸ бошқа гапни айтмоқдалар.

Садриддин 20.03.2009

Товламачиликда гумонланиб¸ бундан бир ой аввал қамоққа олинган ўзбекистонлик журналист ва ҳуқуқ фаоли Дилмурод Саййид устидан Самарқанд вилоят прокуратураси тергов-суриштирув ўтказмоқда.

22 мартда ўзбекистонлик журналист ва инсон ҳуқуқи ҳимоячиси Дилмурод Сайииднинг қўлга олинганига бир ой бўлади. Лекин унга нисбатан қўзғатилган жиноий иш бўйича тергов суриштирувлари ниҳоясига етаëтган ҳафтанинг душанба куни бошланди.

Адвокат Ҳасан Маҳбубовнинг айтишича, чоршанба куни Дилмурод Саййид жабрланувчи Аслиддин Ўринбоев билан юзма-юз учраштирилган ва Аслиддин Ўринбоевнинг кўрсатмалари Дилмурод Саййид фойдасига анча енгиллик бўлган.

- Aслиддин “Мендан айнан бу пул сўрамаган. Мендан Марғуба сўраган. Лекин Дилмурод аканинг ҳатти-ҳаракатларидан унинг ҳам пул сўраëтганини сезганман” деб айтди. Учрашган пайтда Дилмурод аканинг оғзидан пул деган гап чиқмади¸ деяпти¸ дейди Ҳасан Маҳбубов.

Самарқандлик Марғуба Жўраева фермер Аслиддин Ўринбоевдан пора олаётган пайтда қўлга олинган эди. Марғуба Жўраева биринчи кўрсатмасида бу пулни гўёки Дилмурод Саййид кўрсатмаси билан олганлигини айтган ва бу гап Дилмурод Саййиднинг қўлга олинишига сабаб бўлган эди. Лекин кейинги юзма-юз учрашувда Марғуба Жўраева бу кўрсатмасидан воз кечган эди.

- Юзлаштиришган пайтда у гапидан қайтган. Ўзининг ҳаракати билан айтмоқчики¸ “мен ëлғон гапирганман. Дилмурод аканинг исмини айтганим учун Аслиддин менга пул беришга рози бўлиб қолган”. Ҳозир уклон фирибгарликка кетаяпти¸ дейди адвокат Ҳасан Маҳбубов.

Унинг сўзларига кўра¸ Дилмурод Саййиднинг қамоқдаги аҳволи яхши. Ўзини тетик тутяпти. Унинг олдига адвокатларнинг эркин киришига имкон берилган.

- Шароитлари яхши. Ҳеч ким тазйиқ ўтказаëтгани йўқ. Ҳеч ким ураëтгани йўқ. 10 марталаб кирсак ҳам¸ рухсат бераяпти¸ дейди Ҳасан Маҳбубов.

Лекин Самарқанддаги ҳибсхонага бориб¸ журналист билан бевосита учрашган инсон ҳуқуқларини ҳимоя қилиш “Эзгулик” жамияти фаоли Абдураҳмон Ташановнинг “Озодлик овози” интернет сайтига билдиришича, Дилмурод Саййиднинг қамоқдаги аҳволи яхши эмас.

"У анча озиб қолган ва хаста кўринади" деган Ташанов¸ ҳуқуқ ҳимоячилари Дилмурод Саййидга нисбатан эҳтиёт чорасини ўзгартириш ҳақида Самарқанд вилояти прокуратурасига яна мурожаат қилиб¸ айтилган маблағни гаров эвазига тўлашга тайёр эканликларини билдирганлар.

48 ёшли ўзбек журналисти Дилмурод Саййид 2005 йилда “Адвокат” газетасида Ўзбекистондаги ижтимоий муаммолар ҳақидаги “Йўқ ҳақидаги бадиҳа”сидан сўнг, ишдан ҳайдалган, газета эса ёпиб қўйилган эди.

Сўнгра у мустақил интернет нашрларига мақолалар ёзди ҳамда “Эзгулик” жамиятида инсон ҳуқуқи ҳимоячиси сифатида фаолият олиб борди. Шу йилнинг 22 февралида товламачиликда айбланиб қўлга олинди.

Айни пайтда¸ яна бир журналист - андижонлик 67 яшар Кушодбек Усмонов шу ҳафта Асака шаҳар суди ҳукми билан безориликда айбланиб¸ олти ойлик қамоқ жазосига ҳукм қилинди.

Кушодбек Усмонов маҳаллий нашрларда узоқ йил ишлаган журналист ва бир неча китоблар муаллифи ҳамдир. Журналистнинг адвокати ва яқинлари маҳкама жараёнида унинг айблари тасдиқланмаганини билдиришди

Обама Эронга янги мужда йўллади

himoyachi — Fri, 20 Mar 2009 14:23:18 GMT

Обама Эронга янги мужда йўллади

Барак Обама¸ 20 март кунги видеомурожаати билан Эрон раҳбарияти билан бевосита мулоқот қилиш ҳақда кўпдан гапириб келган ваъдасини амалга оширишга киришди.

20.03.2009

АҚШ президенти 30 йилдан бери совуқ уруш ҳолатида келаëтган Вашингтон -Теҳрон муносабатларини ўзгартиришга қаратилган қадамга қўл урди ва Наврўз муносабати билан Эрон халқига видеотабрик йўллади.

Обаманинг инглиз тилидаги Наврўз табриги ëзилган видеомурожаатнинг форс тилидаги субтитр билан 20 март куни маҳаллий вақт билан тонгги соат 8 да Эронда намойиш қилингани айтилмоқда.

Бу сайловолди кампаниясидан бери Эрон билан бевосита мулоқот бошлашга ваъда бериб келган Барак Обаманинг оддий эронликлар ва Теҳрон раҳбарияти диққатини ўзига тортиш ниятидаги ноанъанавий уриниши сифатида кўрилмоқда.

- Бугунги янгиланиш мавсумида мен Эрон етакчиларига қарата очиқ гапирмоқчиман. Орамизда жиддий тавофут бор ва вақт ўтиши билан бу тавофут фақат кўпайиб борди.

Менинг маъмуриятим олдимизда турган барча муаммоларни дипломатия орқали¸ АҚШ¸ Эрон ва халқаро ҳамжамият ўртасида конструктив алоқалар шаклланишини рағбатлантириш орқали ҳал қилишга қатъий қарор қилган. Бу жараëнда таҳдидларга ўрин йўқ. Бунинг ўрнига ҳалол ва ўзаро ҳурматга асосланган мулоқот истаймиз¸ деди Эрон раҳбарларига бевосита мурожаат қилган президент Обама.

1979 йилги Эрон Ислом инқилоби ва инқилоб кунлари Теҳрондаги АҚШ элчихонасининг босиб олиниб¸ 52 Америка дипломатининг 444 кун давомида гаровда ушлангани кетидан Вашингтон – Теҳрон ўртасидаги ҳар қандай муносабатлар буткул кесиб қўйилган.

1995 йилда Эроннинг ядровий қурол яратиш ниятидан ташвишга тушган Клинтон маъмурияти¸ АҚШ ширкатларининг исломий жумҳурият билан ҳар қандай олди-бердисини таъқиқловчи санкциялар жорий қилган ва жорий ой Обама бу санкцияларни яна кучда қолдиришга қарор берган эди.

Бу қарори Теҳронда норозилик билан қарши олинганидан саноқли кун ўтиб президент Обама Эрон раҳбариятини орадаги шубҳа ва ишончсизлик пардасини кўтариб¸ халқаро ҳамжамиятнинг тўлақонли аъзоси бўлишга даъват қилди.

- Бугун сизда танлов имкони бор. АҚШ Эроннинг миллатлар жамоаси ичидаги ўз муносиб ўрнини эгаллашини истаëтир. Бу сизнинг ҳаққингиз¸ аммо бу ҳақ тинчликка террор ëхуд қурол воситасида эришиб бўлмасликни англаш маъсулияти билан баробар келади.

Бу ҳақ Эрон халқи ва маданиятининг ҳақиқий буюклигини тинч ҳаракатлар орқали намойиш қилиш билан ҳамоҳанг келади. Бу буюклик эса миллатнинг вайронгарчилик эмас¸ балки унинг бунëдкорлик ва яратиш қудрати билан ўлчанади¸ дея давом этди ўз видеотабригида президент Обама.

- Бугун сиз нишонлаëтган Янги йил муносабати билан мен Эрон халқи ва раҳбариятининг биз истаëтган келажакни тушунишларини хоҳлардим. Бу халқларимиз ўртасидаги мулоқотни жонлантириш¸ шерикчилик ва тижорат учун кенгроқ имконлар яратишни кўзловчи келажакдир. Бу эски яраларни биткизиб¸ бехатарроқ ва тинчроқ дунëда барчамиз бир-биримиз билан яхши қўшни бўлиб яшашни кўзда тутувчи келажакдир¸ деди АҚШ президенти Барак Обама Эрон халқи ва раҳбариятига йўллаган Наврўз видеотабригида.

Обаманинг Эронга йўллаган бу дўстона муждаси халқаро майдонда олқиш билан қарши олинди.

Хусусан¸ Европа Иттифоқининг ташқи алоқалар бўйича мутасаддиси Хавъер Солана¸ Обама мурожаатига юқори баҳо берди.

- Мен буни жуда конструктив мурожаат¸ деб баҳолайман. Эронликларнинг Обама айтган гапларга яхши эътибор қаратишларига умид қиламан. Бу мужданинг Теҳрон билан муносабатларда янги давр бошлашига ҳам умид қилмоқдаман¸ деди ЕИ расмийси.

Россия Ташқи ишлар вазири ўринбосари Сергей Рябков ҳам¸ Обама видеомурожаатига шунга яқин баҳо берди.

- Биз Обама мурожаатини олқишлаймиз. Бизнингча¸ Обама маъмуриятининг Эрон билан сиëсий ва дипломатик алоқа ўрнатиш уринишлари жуда муҳим. АҚШ ва халқаро ҳамжамиятнинг Эрон ядровий дастури билан боғлиқ хавотирларини бартараф қилишнинг энг яхши йўли шу¸ деб биламиз¸ деди юқори даражали Москва дипломати.

Айни пайтда расмий Теҳрон Барак Обама мурожаатини олқишлаб, эндиликда Оқ уй раҳбари ўз сўзларини амалда исботлаши лозимлигини таъкидлади.

Эрон президенти Маҳмуд Аҳмадийнажод ёрдамчиси Али Акбар Жавонфикр расмий Вашингтон ўз хатоларини тан олиб¸ уларни тўғрилашга ҳаракат қилиши лозим, деган фикрларни билдирди