2003-2005 йиллари радио бирмунча холисроқ эди, мамлакат ичидаги жамики
мухолифат вакиллари ва шу жумладан ҳуқуқ ҳимоячиларига минбар бўлган
эди. Аммо 2006 йилда радиодаги кадрлар ўзгариши муносабати билан
Бобожоновлар таъсир кучига эга бўлгач, эшиттиришлар фақат ва фақат
маълум бир гуруҳ позициясини ёритишга, бу гуруҳ асосий эътиборга лойиқ
деган тасаввур пайдо қилишга ўтиб олди.

Радио раҳбарияти кўп ҳолларда айнан ўзбек хизматидаги ходимларнинг
фикрига ва маълум масалалар юзасидан нуқтаи назарига таянади, зеро
ходимлар ўз эшиттириш диапазонидаги вазиятни яхшироқ билади деб
ҳисоблайди. Аммо бу сиёсат Бобожоновларнинг шахсий истаклари йўлида
суистеъмол қилинаётганини англамаяпти.

Мамлакат ичидаги кўп ҳолатлар бўйича нотўғри ва бирёқлама маълумотлар
кетмоқда. Эслатиш керакки, Бобожоновлар Ўзбекистондан чиқиб кетганига
салкам 10-12 йил бўлди ва бу оралиқда мамлакатнинг ўзида ҳам талай
сиёсий фаоллик, айрим янги мухолиф гуруҳлар ва ҳуқуқ ҳимоячилари
пайдо бўлди. Янги таҳлилчилар ва кузатувчилар шаклланди. Қолаверса,
одамлар онгидаги қарашлар ва муносабатлар ўзгарди, Бобожоновлар эса
ўша эски қарашларни ҳали ҳам мавжуд дея тақдим этмоқдаки, бу ҳолат
мухолифатнинг янги куч ва потенциалини қасддан йўққа чиқаришга олиб
келади.

Охирги пайтларда АҚШ ҳукумати худди ЕИ қатори Ўзбекистон раҳбарияти
билан мулоқотни тиклаб, айнан ана шу мулоқот ёрдамида демократик
ислоҳотлар ва хусусан инсон ҳуқуқларига оид вазиятни ўзгартиришга
эришиш йўлини танлади. Минг машаққат билан тикланаётган алоқалар
эвазига бир нечта ҳуқуқ ҳимоячилари озод қилинди ва яна бир
қанчасининг масаласи муҳокамада. Муҳокамалар орасида худи ЕИ қатори
АҚШ расмийлари оммавий ахборот воситаларининг Ўзбекистонга қайтиши
масаласини ҳам кўрмоқда. Аммо радионинг айрим чиқишлари айнан ана шу
имкониятни йўққа чиқаришга қаратилган.

Масалан, Ўзбекистон ҳукумати зинҳор аллақандай инқилобларни даъват
қилувчи ва ҳукумат назарида инқилобий хавф туғдириши мумкин бўлган
кимсаларга доимий минбар бўлувчи ОАВнинг қайтишига рози бўлмайди.
Бобожоновлар буни жуда яхши билишади ва назаримизда бундан устамонлик
билан фойдаланмоқда. Йўқ нарсани бор деб бериш орқали улар радионинг
мамлакатга қайтиши масаласини йўққа чикқармоқда.

Ўзбекистонда ҳар куни ўнлаб ҳуқуқ ҳимоячилари, мухолифат вакиллари ва
оддий фуқаролар "Озодлик"нинг Тошкентдаги собиқ офисига, унинг собиқ
ходимларига мурожаат қилиб, минбар сўрашади. Бунга радиода кетаётган
аксар хабарларнинг асл ҳолатни бирмунча нотўғри ёритаётгани ва маълум
воқеанинг асл иштирокчилари эмас, уни эшитганлардан бу ҳақда маълумот
берилаётгани сабаб бўлмоқда.

Дарҳақиқат, бугун радио электрон ОАВларда чиқаётган маълумотларга
таяниб эшиттириш тайёрламоқда. Сабаби Бобожоновлар вазиятни бевосита
кузатаётган аксар маҳаллий журналистларни ёқтирмайди, уларни ўзига
душман билади, бу эса радионинг ҳаққонийлик принципига кескин таъсир
қилади.

Ўзбекистондаги вазиятни билмаслик деярли ҳар кунги дастурларда
сезилади ва бу жиддий хатоларга олиб келмоқда. Хатолари ошкор бўлгач
эса бундан кўз юмилади ва ҳатто кечирим ҳам сўрашмайди. Масалан,
Ўзбекистон Ахборотлаштириш ва коммуникация агентлиги раҳбари
А.Ариповни шоир ва Ёзувчилар уюшмаси раҳбари А. Орипов билан
адаштириб, "бу раҳбар биратўла шунча соҳани бошқаради", деб уни танқид
қилишганди. Бу хато учун зинҳор эшитувчилардан узр сўралмади. Бундай
мисолларни кўплаб келтириш мумкин. Бу яна бир бор, ходимлар
Ўзбекистондаги соҳалар, ҳолатлар, сиёсий элита ва умуман бошқарув
тизими бўйича маълумотга эга эмасликларини кўрсатади. Мамлакатдаги
вилоят ва туманларнинг географик ўрнини адаштириш, улар ҳақида нотўғри
статистика берилиши эса Радио хизматчилари учун одатий ҳолга айланиб
қолган.

Қариийб 20 йилдан бери зўравонлик қурбони бўлиб келаётган ўзбек
халқи бундан буён бошқа миллатлар каби эркин - эмин яшашга ҳақлидир.
Ўзбек халқининг фаровон ҳаёти йўлида курашаётган биз демократик ташкилот
вакиллари Бобожоновларнинг "Озодлик" радиосининг ўзбек
шўъбасидаги бугунги фаолиятини кескин қоралаш билан бирга уларнинг
радиодаги фаолиятларига чек қўйилмагунча, ўзбек эшиттиришларида
цензура тугатилиб, сўз эркинлиги, демократияга кенг ўрин берилмагунча
"Озодлик" радиосига бойкот эълон қиламиз.

Баёнотни қўллаб қувватловчилар рўйхати:

Demokratik O'zbekiston Kongressi bu bayonotni to'la qo'llaydi.
"Ozodlik" radisini demokratik minbarga aylantirishda buning ozgina
bo'lsada foydasi tegsa bundan mamnunmiz.
Yangi yilda ishlaringizga omadlar tilaymiz.

Hurmat bilan Jahongir Mamatov, AQSHda 18-11-2005 da ro'yxatdan o'tgan
Demokratik O'zbekiston Kongressining raisi
Best regards, Jahangir Mamatov, The Chairman of The Congress of
Democratic Uzbekistan (registred in US on 11-18-2005, non-profit)
www.uzbekcongress.org