"Ўлмас қоялар" Францияда нашр этилди

Таниқли ўзбек ёзувчиси Мамадали Маҳмудовнинг "Ўлмас қоялар" романи француз тилида нашр этилган.

1999 йилдан буён Ўзбекистон қамоқхонасида сақланаётган адибнинг асарини Филипп Фризон француз тилига таржима қилган.

1981 йилда "Шарқ юлдузи" журналида чоп этилган "Ўлмас қоялар" романи Марказий Осиёнинг Россия томонидан босиб олиниши, туркий халқларнинг Россия босқинига қарши курашига бағишланган.

Шўролар тузумининг мафкурасига зид асарнинг журналда чоп этилиши таҳририят ходимлари ва ёзувчига нисбатан босимларга сабаб бўлган.

Романни 1991 йилда китоб ҳолида чоп этишга муваффақ бўлинган, Эврил Турон тахаллусини олган ёзувчи китобни "Бу тоғлар - улуғ тоғлар" деб номлаган.

Айни пайтда Халқаро Ёзувчилар уюшмаси - PEN Мамадали Маҳмудов ва Ўзбекистон қамоқхоналарида сақланаётган ижодкорларнинг озод этилиши учун кампанияни давом эттирмоқдалар.

Халқаро Ёзувчилар уюшмаси Ўзбекистон Президенти Ислом Каримовга мурожаат билан чиққан, Мамадали Маҳмудов, Юсуф Жума, Муҳаммад Бекжон, Жамшид Каримов ҳамда Солижон Абдураҳмоновларнинг тақдиридан хавотирда эканлигини билдирган.

Мамадали Маҳмудов 1999 йилги Тошкент портлашларига алоқадорлик айблари билан ҳибсга олинган, бироқ ўзбек маҳкамасининг ёзувчини айбдор деб топиб, озодликдан маҳрум этиш қарорининг асосли экани савол остига олинган.

Қамоқхонада адибнинг соғлиги ёмонлашгани ҳақида бир неча марта хабар қилинган.

Ҳозирги пайтда Мамадали Маҳмудовнинг силдан азият чекаётгани, тез тиббий ёрдамга муҳтож эканлиги маълум қилинган.

Истиқлол даврида қамоққа ташланган Мамадали Маҳмудов Ўзбекистон Президенти Ислом Каримовга мактубида совет даврида шўро тузумига зид - мустақиллик ҳақида асарлар ёзган эсада, уни қамашмагани ва ё жазолашмагани ҳақида ёзган.