Ҳалқаро гуруҳларга кўра, Андижон воқеасида 500дан ортиқ инсон ҳалок бўлган, Тошкент 187 инсон қурбон бўлганини айтади

Страсбургдаги Инсон Ҳуқуқлари бўйича Оврўпо Маҳкамаси Андижон воқеаларига алоқадорлик айбловлари билан Ўзбекистонни тарк этишга мажбур бўлган 13 тадбиркорнинг ҳуқуқларини бузганликда Россия мулозимларинини айблаб чиққан.

Маҳкаманинг маълум қилишича, Россия 12 ўзбек ва бир нафар қирғиз фуқаросининг ҳуқуқларини поймол этиб, йигирма ой давомида ҳибсда ушлаб турган.

13 кишининг ҳеч бири ўзларига қўйилган айбловларга иқрор бўлишмаган.

Шу билан бирга Страсбург маҳкамаси Россияда ҳибсга олинган Ўзбекистон фуқароси Дилшод Қурбоновни ватанига экстрадиция этиш жараёнини тўхтатиш қарорини чиқарган.

Расмий Тошкент Дилшод Қурбоновни диний ақидапарастликда айблаб, Ўзбекистонга топширилишини талаб этмокда.

Маҳкамага кўра, агар Россия Ўзбекистон фуқароларини ватанга экстрадиция қилса, уларнинг ҳуқуқини поймол этган бўлади, ва улар Ўзбекистонда таҳқирлов ва таъқибга учрашлари мумкин.

Оврўпо маҳкамаси ўз қарори билан ҳар бир судланувчига 23,910 доллар товон тўланиши, ва уларнинг барчасига умумий ҳисобда маҳкама иши ҳаражатлари учун 28,228 минг доллар тўланиши лозимлигини айтган.